மறைந்த மகாராணி இரண்டாம் எலிசபெத்தின் ஆரோக்கியமான டயட் இதுதான்!

ராணி இரண்டாம் எலிசபெத் 96 வயது வரை ஆரோக்கியமாக வாழந்ததற்கு மிக முக்கியமான காரணம் அவருடைய உணவுமுறையும் தினசரி செய்யும் எளிய உடற்பயிற்சிகளும் ஆரோக்கியமான வாழ்க்கை முறையும் தானாம்.

பக்கிங்ஹாம் அரண்மனை மற்றும் வின்ட்சர் கோட்டையில் உள்ள அரச சமையலறைகளில் திறமையான சமையல்காரர்கள் பணி அமர்த்தப்பட்டு, ஆரோக்கியமான உணவுகளை சமைக்கப்படுகிறது. ராணி எலிசபெத்துக்கு சமைப்பதற்காக மட்டுமே தனியாக சில சமையல்காரர்கள் இருக்கிறார்கள்.

 பிரெஞ்சு மொழியில் எழுதப்பட்டு சிவப்பு நிற லெதர் கொண்டு கவர் செய்யப்பட்ட, உணவுப்பட்டியல்கள் அடங்கிய ஒரு மெனு புத்தகம் வாரந்தோறும் ராணி எலிசபெத்துக்கு அனுப்பி வைக்கப்படும். அதில் மாற்றங்கள் இருந்தால் ராணி தெரிவிப்பார். 

அந்தவகையில் இவர் 96 வயது வரை ஆரோக்கியமாக வாழ என்னென்ன உணவுமுறைகளை பின்பற்றினார் என்பதை பார்ப்போம்.

BETTMANN/GETTY IMAGES 

காலை உணவு

காலை தூங்கி எழுந்ததும் ராணிக்கு எர்ல் கிரே டீயுடன் தொட்டுக்கொள்ள சில பிஸ்கட்டுகள் இருக்க வேண்டும். அதை எழுந்து பல் துலக்கியதும் தன்னுடைய பிரத்யேகமான தனி டைனிங் ரூமிலேயே சாப்பிட்டு விடுவார்.

அதையடுத்து காலை குளித்து தயாரானதும் அவருடைய ராயல் உணவுகள் தொடங்கும். காலை உணவில் பெரும்பாலும் யோகர்ட், செரல் (அ) மல்டிகிரெய்ன் டோஸ்ட் இருக்கும்.

சில சமயங்களில் ராணிக்கு மிகவும் பிடித்த மீன் வகைகள் ஏதாவது இருக்கும். இதுவே ஏதேனும் ஸ்பெஷல் நாட்களாக இருந்தால் ராணி எலிசபெத் ஸ்கிராம்பல்டு எக் மற்றும் ஸ்மோக்டு சால்மன் மீனும் சாப்பிடுவார் என்று பிரிட்டிஷ் ஹெரிடேஜ் டிராவல் புத்தகத்தில் குறிப்பே எழுதப்பட்டிருக்கிறது.

 மதிய உணவு

ராணி எலிசபெத் மதிய நேரங்களில் மிக லைட்டான உணவுகளையே எடுத்துக் கொள்வாராம். மிக கொஞ்சமாக புரத உணவுகள் அதோடு கொஞ்சம் ஜின் மற்றும் அவருக்கு பிடித்த காக்டெயில் ஏதாவது எடுத்துக் கொள்வார்.

கிரில்டு மீன் மற்றும் ஸ்பின்னாச் அல்லது க்ரில்டு சிக்கன் ஆகியவை தான் அவருடைய பெரும்பாலான நாட்களில் இருக்கும் மதிய உணவு.

MAX MUMBY/INDIGO//GETTY IMAGES 

இரவு உணவு

எலிசபெத் ராணி இரவு உணவு மிக சிம்பிளானது தான். ஏதேனும் இறைச்சி அல்லது மீன் அதனோடு நிறைய காய்கறிகள் சேர்க்கப்பட்டிருக்கும்.

விஸ்கி சாஸ் சேர்த்து செய்யப்பட்ட மஸ்ரூம் மிகவும் பிடிக்குமாம். அதை சாப்பிட்டு முடித்ததும் இறுதியாக டெசர்ட்டில் சாக்லெட் கேக் அல்லது ஒரு பௌல் ஃபிரஷ்ஷான பழங்கள் இருக்க வேண்டும்.

தேநீர் நேரங்களில் சாப்பிடுவது

தேநீர் குடிப்பது ராணி இரண்டாம் எலிசபெத்துக்கு மிகப் பிடித்த ஒன்று. இதிலும் இயர்ல் கிரே டீ தான்

டீ குடிக்கும்போது எப்போதுமே பிஸ்கட்டுகள் சாப்பிடும் பழக்கம் ராணிக்கு உண்டு. குறிப்பாக சாக்லெட் பிஸ்கட், ஜிஞ்சர் கேக் ஆகியவை அவருடைய டீ டைம் ஃபேவரைட் உணவுகள்

சாப்பிடாத சில உணவுகள்

• ஒட்டகம் முயல் போன்ற சில இறைச்சி வகைகள்
• வேகவைத்த முட்டை,
• உருளைக்கிழங்கு
• வெங்காயம் மற்றும் பூண்டு
• ஒயிட் பிரட்,
• வாழைப்பழம்
• சர்க்கரை சேர்த்த டீ