மதுரை பாணியில் மட்டன் கறிதோசை... இப்படி ஒரு முறை செய்து பாருங்க

பொதுவாகவே விதவிதமாக சமைத்து சாப்பிடுவது அனைவருக்கும் பிடித்த விடயமாகவே இருக்கும். இன்னும் சொல்லப்போனால் இது மனிதர்களுக்கு மட்டுமே கிடைத்த வரம் என்று கூறினால் மிகையாகாது. 

ஞாயிற்று கிழமைகளில் பெரும்பாலானவர்களுக்கு விடுமுறை என்பதால் இன்று புதிய உணவு வகைகளை செய்து சாப்பிடுவதற்கு நேரம் கிடைக்கும். 

அந்தவகையில் இன்று மதுரை பாணியில் அசத்தல் சுவையில் மட்டன் கறிதோசையை எவ்வாறு செய்து சாப்பிடலாம் என்பது குறித்து இந்த பதிவில் பார்க்கலாம்.

பாரம்பரிய முறையில் சின்ன வெங்காய சாம்பார்... வெறும் 10 நிமிடங்கள் போதும்

தேவையான பொருட்கள்

மட்டன் கறி மசாலாவிற்கு தேவையானவை 

எண்ணெய் - 1 மேசைக்கரண்டி 

வெங்காயம் - 2 (பொடியாக நறுக்கியது)

பச்சை மிளகாய் - 2 (பொடியாக நறுக்கியது) 

கறிவேப்பிலை - 1 கொத்து 

இஞ்சி பூண்டு பேஸ்ட் - 1 தே.கரண்டி 

தக்காளி - 2 (பொடியாக நறுக்கியது) 

கல் உப்பு - 1 தே.கரண்டி

மிளகாய் தூள் - 1 தே.கரண்டி

மல்லித் தூள் - 1 தே.கரண்டி

சீரகத் தூள் - 1 தே.கரண்டி

மஞ்சள் தூள் - 1/4 தே.கரண்டி

மிளகுத் தூள் - சிறிது 

மட்டன் கொத்துக்கறி - 1/2 கிலோ 

தண்ணீர் - சிறிதளவு

கரம் மசாலா - 1/4 தே.கரண்டி

கொத்தமல்லி - சிறிதளவு

தோசைக்கு தேவையானவை

முட்டை - 2

தோசை மாவு - தேவையான அளவு 

எண்ணெய் - தேவையான அளவு 

கொத்தமல்லி - சிறிதளவு

செய்முறை

முதலில் ஒரு பாத்திரத்தை அடுப்பில் வைத்து, அதில் எண்ணெய் ஊற்றி சூடானதும், பொடியாக நறுக்கிய வெங்காயம், பச்சை மிளகாய், கறிவேப்பிலை ஆகியவற்றை போட்டு நன்றாக வதக்கிக்கொள்ள வேண்டும்.

அதனையடுத்து இஞ்சி பூண்டு பேஸ்ட் , பொடியாக நறுக்கிய தக்காளி மற்றும் கல் உப்பு சேர்த்து தக்காளி மென்மையாகும் வரையில் நன்றாக வதக்கிக்கொள்ள வேண்டும். 

பின்னர் அதனுடன் மிளகாய் தூள், மல்லித் தூள், சீரகத் தூள், மஞ்சள் தூள், மிளகுத் தூள் ஆகியவற்றை சேர்த்து 2 நிமிடங்கள் வரையில் நன்றாக வதக்கிக்கொள்ள வேண்டும்.

அதனையடுத்து மட்டன் கொத்துக்கறியை கழுவி சேர்த்து, 5 நிமிடங்கள் வரையில் நன்றாக வதக்கிக்கொள்ள வேண்டும். பின்னர் மூடி சிறிது நேரம் வேகவிட வேண்டும். 

பின்னர் கரம் மசாலா மற்றும் கொத்தமல்லியைத் தூவி இறக்கினால், கொத்துக்கறி மசாலா தயார். 

அதனையடுத்து ஒரு பாத்திரைத்தில்  2 முட்டைகளை உடைத்து ஊற்றி நன்கு அடித்துக் கொள்ள வேண்டும். 

அதனையடுத்து  தோசைக் கல்லை அடுப்பில் வைத்து, அதில் ஒரு கரண்டி தோசை மாவை ஊற்றி, ஊத்தாப்பம் போன்று தடிமனாக ஊற்றி கொள்ள வேண்டும்.

பின்னர் அதன் மேல் சிறிது முட்டையை ஊற்றி, பின் கறி மசாலாவை பரப்பி, எண்ணெய் ஊற்றி, தோசைக்கரண்டியால் மசாலாவை அழுத்திவிட்டு, பின் திருப்பிப் போட்டு வேகவிட்டு எடுத்தால் அவ்வளவு தான். அசத்தல் சுவையில் மதுரை  கறி மசாலா தோசை தயார்.  

அடிக்கடி டீ குடிக்கும் பழக்கம் இருக்கா? அப்போ உங்களுக்கு இந்த Problem வரலாம்- எச்சரிக்கை