நினைவுகளை மீட்ட பாடல்: அப்துல் மஜீத்தின் புதல்வர்களை நெகிழவைத்த பொத்துவில் அஸ்மின்

மர்ஹூம் எஸ்.எஸ்.பி. அப்துல் மஜீத் நினைவில் எழுந்த பாடல்: புதல்வர்களை கண்கலங்க வைத்த பொத்துவில் அஸ்மின் மறைந்த முன்னாள் பாராளுமன்ற உறுப்பினரும், ஓய்வுபெற்ற மூத்த காவல்துறை அதிகாரியுமான (SSP) மர்ஹூம் அப்துல் மஜீத் அவர்களின் புதல்வர்களான பொறியியலாளர் ஜகான் மஜீத் மற்றும் டாக்டர் ஜெம்சித் மஜீத் ஆகியோரை கவிஞர், எழுத்தாளர், பாடலாசிரியர் மற்றும் ஊடகவியலாளரான பொத்துவில் அஸ்மின் அண்மையில் மரியாதை நிமித்தமாகச் சந்தித்தார்.

இதன்போது, தனது கலை, இலக்கியம், ஊடகம், இசை மற்றும் திரைப்படப் பயணங்களை ஆவணப்படுத்திய Amazon-இல் வெளியிடப்பட்ட ஆங்கில நூலான “POTTUVIL ASMIN: From Pottuvil to the World – A Global Tamil Voice” என்ற நூலின் பிரதியை அவர்களிடம் அன்புடன் வழங்கினார். அதனைத் தொடர்ந்து, மர்ஹூம் அப்துல் மஜீத் அவர்களின் மனிதநேயம், நேர்மை, அர்ப்பணிப்பு மற்றும் பொதுச்சேவையைப் போற்றும் வகையில் பொத்துவில் அஸ்மின் இயற்றி வெளியிட்ட “காக்கிச் சட்டை போட்டு வந்த காந்தி மகானு” என்ற நினைவுப் பாடலை இருவரும் இணைந்து கேட்டனர். பாடல் ஒலித்துக் கொண்டிருந்தபோது, தந்தையின் நினைவுகளும் அவர் வாழ்ந்த மனிதநேய வாழ்க்கையும் கண்முன் விரிந்ததால், பொறியியலாளர் ஜகான் மஜீத் மற்றும் டாக்டர் ஜெம்சித் மஜீத் ஆகிய இருவரும் தங்களது உணர்வுகளைக் கட்டுப்படுத்த முடியாமல் கண்கலங்கினர்.

அந்தக் காட்சியே அங்கு இருந்த அனைவரையும் ஆழ்ந்த நெகிழ்ச்சியில் ஆழ்த்தியது. இந்த நினைவுப் பாடல், மர்ஹூம் அப்துல் மஜீத் அவர்களின் உறவினர்கள், நண்பர்கள் மற்றும் அவரை நேசித்த ஏராளமானோரிடமும் பெரும் உணர்வெழுச்சியை ஏற்படுத்தியுள்ளது. பாடலைக் கேட்ட பலரும் கண்கலங்கியதுடன், அவரது மனிதநேயம், எளிமை, பொதுச்சேவை மற்றும் தலைமைத்துவப் பண்புகளை மீண்டும் நினைவுகூர்ந்ததாகத் தெரிவித்துள்ளனர். இச்சந்திப்பின்போது இலக்கியம், கலை, சமூகப் பணி மற்றும் மர்ஹூம் அப்துல் மஜீத் அவர்களின் வாழ்க்கைப் பாரம்பரியம் குறித்து அர்த்தமுள்ள கலந்துரையாடல்களும் இடம்பெற்றன. மேலும், அவரது சேவைகளையும் மனிதநேய விழுமியங்களையும் எதிர்கால தலைமுறைகளிடம் கொண்டு சேர்க்க வேண்டிய அவசியமும் வலியுறுத்தப்பட்டது. இச்சந்திப்பு குறித்து கருத்துத் தெரிவித்த பொத்துவில் அஸ்மின், “பொறியியலாளர் ஜகான் மஜீத் மற்றும் டாக்டர் ஜெம்சித் மஜீத் ஆகியோரின் அன்பான வரவேற்பும், நான் எழுதிய நினைவுப் பாடலைக் கேட்டபோது அவர்கள் கண்கலங்கிய தருணமும் என் மனதை ஆழமாகத் தொட்டது. அந்தப் பாடலுக்கு அவர்கள் தெரிவித்த பாராட்டுகளும், அன்பும் எனக்கு மிகுந்த மனநிறைவையும் ஊக்கத்தையும் அளித்தன. இந்தச் சந்திப்பு என் இலக்கிய மற்றும் கலைப் பயணத்தில் என்றும் மறக்க முடியாத ஓர் அரிய நினைவாக நிலைத்திருக்கும்,” என்று தெரிவித்தார்.