ரூ.100 லட்சம் கோடி சொத்துக்கு சொந்தக்காரர்; வாடகை வீட்டில் வசிக்கும் எலான் மஸ்க்!

உலகின் மிகப் பெரிய பணக்காரராக அறியப்படும் எலான் மஸ்க், உலக வரலாற்றில் முதல் முறையாக 1 டிரில்லியன் அமெரிக்க டாலர் சொத்து மதிப்பை எட்டிய நபராக உருவெடுத்துள்ளார்.

விண்வெளி ஆய்வு நிறுவனமான ஸ்பேஸ் எக்ஸ், மின்சார வாகன உற்பத்தி நிறுவனமான டெஸ்லா மற்றும் எக்ஸ் (முன்னாள் ட்விட்டர்) சமூக வலைத்தளம் உள்ளிட்ட பல்வேறு நிறுவனங்களின் தலைவராக உள்ள எலான் மஸ்க், தொழில்நுட்ப உலகின் மிகவும் செல்வாக்கு மிக்க தொழிலதிபர்களில் ஒருவராகக் கருதப்படுகிறார்.

சாணக்கிய நீதி : இந்த குணம் கொண்ட பெண்கள் புகுந்த வீட்டை சொர்க்கமாக மாற்றுவார்களாம்!

சமீபத்தில், மஸ்க்கின் விண்வெளி ஆய்வு நிறுவனமான ஸ்பேஸ் எக்ஸ் அமெரிக்காவின் நாஸ்டாக் பங்குச் சந்தையில் பட்டியலிடப்பட்டதாகவும், அதன் ஒரு பகுதியாக 7,500 கோடி அமெரிக்க டாலர் மதிப்பிலான பொதுப் பங்கு வெளியீடு அறிவிக்கப்பட்டதாகவும் தகவல்கள் தெரிவிக்கின்றன.

ஆரம்பத்தில் ஒரு பங்கின் விலை 135 அமெரிக்க டாலராக நிர்ணயிக்கப்பட்டிருந்த நிலையில், வர்த்தகம் தொடங்கிய சில மணி நேரங்களிலேயே அதன் மதிப்பு 21 சதவீதத்திற்கும் அதிகமாக உயர்ந்தது.

இதன் விளைவாக, ஸ்பேஸ் எக்ஸ் நிறுவனத்தின் மொத்த சந்தை மதிப்பு 2.15 டிரில்லியன் அமெரிக்க டாலராக உயர்ந்ததாகக் கூறப்படுகிறது. நிறுவனத்தின் பெரும்பான்மைப் பங்குகளை வைத்திருக்கும் எலான் மஸ்க்கின் சொத்து மதிப்பும் இதன் மூலம் கணிசமாக அதிகரித்துள்ளது.

ரூ.100 லட்சம் கோடியை கடந்த சொத்து மதிப்பு ஸ்பேஸ் எக்ஸ் நிறுவனத்தின் பங்கு மதிப்பு உயர்வைத் தொடர்ந்து, எலான் மஸ்க்கின் மொத்த சொத்து மதிப்பு 1 டிரில்லியன் அமெரிக்க டாலரைத் தாண்டியுள்ளதாக தகவல்கள் வெளியாகியுள்ளன.

இந்திய மதிப்பில் இது கிட்டத்தட்ட ரூ.100 லட்சம் கோடிக்கு சமமானதாகும். இதன் மூலம், உலக வரலாற்றிலேயே டிரில்லியன் டாலர் சொத்து மதிப்பை எட்டிய முதல் நபர் என்ற பெருமையை அவர் பெற்றுள்ளதாகக் கூறப்படுகிறது.

மேலும், இந்தப் பட்டியலிடலின் மூலம் ஸ்பேஸ் எக்ஸ் நிறுவனம், அமெரிக்காவின் பொதுப் பங்குச் சந்தையில் பட்டியலிடப்பட்ட நிறுவனங்களில் ஆறாவது மிகப்பெரிய நிறுவனமாக உருவெடுத்துள்ளதாகவும் தகவல்கள் தெரிவிக்கின்றன.

அளவற்ற செல்வம் - எளிமையான வாழ்க்கை

அளவிட முடியாத அளவுக்கு செல்வம் இருந்தாலும், எலான் மஸ்க்கின் வாழ்க்கை முறை பலரையும் ஆச்சரியப்படுத்தும் வகையில் மிகவும் எளிமையானதாகவே உள்ளது.

அமெரிக்காவின் டெக்சாஸ் மாநிலத்தில் உள்ள போகா சிகா பகுதியில், ஸ்பேஸ் எக்ஸ் நிறுவனத்தின் ‘ஸ்டார்பேஸ்’ ஏவுதளத்திற்கு அருகில் அமைந்துள்ள சிறிய வீட்டில்தான் அவர் பெரும்பாலும் வசித்து வருகிறார்.

‘பாக்ஸபிள்’ (Boxabl) என்ற ஸ்டார்ட்-அப் நிறுவனம் வடிவமைத்த இந்த வீட்டை, ஸ்பேஸ் எக்ஸ் நிறுவனத்தின் மூலம் வாடகைக்கு எடுத்து பயன்படுத்தி வருகின்றாராம். சுமார் 400 சதுர அடி பரப்பளவு கொண்ட இந்த வீட்டில் ஒரு சிறிய வரவேற்பறை, ஒரு படுக்கையறை, சமையலறை மற்றும் குளியலறை மட்டுமே உள்ளன.

உலகின் மிகப்பெரிய செல்வந்தர்களில் ஒருவராக இருந்தாலும், இந்த எளிமையான வீட்டிலேயே தனது பெரும்பாலான நேரத்தை எலான் மஸ்க் செலவிடுகிறார்.

ஆஸ்டின் நகரைச் சுற்றிய பகுதிகளில் அவருக்குச் சொந்தமான நிறுவனங்களின் கீழ் பல பெரிய வீடுகள் மற்றும் சொத்துகள் இருந்தபோதிலும், இந்தச் சிறிய வீட்டையே அவர் மிகவும் விரும்புவதாக கூறியுள்ளார்.

முதல்வர் விஜயை குடும்பத்துடன் சந்தித்த நடிகை சிம்ரன்! உணர்வுபூர்வ பதிவு வைரல்!

பல்வேறு நேர்காணல்களிலும் சமூக ஊடக பதிவுகளிலும், இந்த வீட்டை “மிகவும் அற்புதமான இடம்” என அவர் பாராட்டியிருப்பதும் குறிப்பிடத்தக்கது.

அளவற்ற செல்வமும் உலகளாவிய புகழும் பெற்றிருந்தாலும், எளிமையான வாழ்க்கை முறையைத் தேர்ந்தெடுத்து வாழும் எலான் மஸ்கின் அணுகுமுறை உலகம் முழுவதும் பலரின் கவனத்தை ஈர்த்து வருகிறது.