வேர்க்கடலை சட்னியில் இதை மட்டும் சேர்த்து செய்ங்க - சுவை அள்ளும்

தற்போது கோடை காலத்தில் மாங்காய் விலை மிகவும் மலிவாக கிடைக்கும். இந்த நேரத்தில் எல்லோரது வீட்டிலும் மாங்காய் ரெசிபி தான் செய்துகொண்டிருப்பார்கள். 

மாங்காய் வைத்து எப்போதும் போல ஒரே ரெசிபி செய்யாமல் அதை வேறு ரெசிபிகளில் பயன்படுத்தும் போது இன்னும் சுவை அதிகரிக்கும். 

எல்லோருக்கும் வேர்க்கடலை சட்னி என்றால் மிகவும் பிடிக்கும். இந்த வேர்க்கடலை சட்னியில் கொஞ்சம் மாங்காய் சேர்த்து செய்தால் சுவை பிரமாதமாக இருக்கும். 

இந்த சட்னி இட்லி, தோசையுடன் மட்டுமின்றி, சூடான சாதத்துடன் சேர்த்து சாப்பிடவும் அற்புதமாக இருக்கும்.

பதிவில் பச்சை மாங்காய் வேர்க்கடலை சட்னியை எப்படி செய்யலாம் என்பதை ரெசிபியுடன் தெளிவாக கற்றுக்கொள்ளலாம். 

தேவையான பொருட்கள்

• எண்ணெய் - 2 ஸ்பூன்
• உருட்டு உளுந்து - 3 ஸ்பூன்
• பச்சை வேர்க்கடலை - 1 கைப்பிடி
• இஞ்சி - 3 துண்டு
• வரமிளகாய் - 3
• சின்ன வெங்காயம் - 15
• பெரிய வெங்காயம் - 1 (நறுக்கியது)
• கறிவேப்பிலை - 1 கைப்பிடி
•  மாங்காய் - 1 (துண்டுகளாக்கப்பட்டது)
• உப்பு - சுவைக்கேற்ப

தாளிப்பதற்கு

• எண்ணெய் - 1 டீஸ்பூன்
• கடுகு - 1/2 டீஸ்பூன்
• உளுத்தம் பருப்பு - 1 டீஸ்பூன்
• கறிவேப்பிலை - 1 கொத்து
• வரமிளகாய் - 1

செய்முறை

சட்னி செய்ய முதலில் ஒரு பாத்திரத்தை அடுப்பில் வைத்து அதில் எண்ணெய் ஊற்றி அது நன்றாக காய்ந்ததும் உளுத்தம் பருப்பு சேர்த்து நன்றாக வதக்க வேண்டும். 

பின்னர் அதில் பச்சை வேர்க்கடலையை சேர்த்து நன்கு வறுக்க வேண்டும். பின்னர்  நறுக்கிய இஞ்சி, வரமிளகாயை சேர்த்து நன்கு வதக்க வேண்டும்.

அடுத்து அதில் சின்ன வெங்காயத்தை சேர்த்து வதக்க வேண்டும். பின்னர் அதில் நறுக்கிய பெரிய வெங்காயத்தை சேர்த்து வெங்காயம் பொன்னிறமாகும் வரை வதக்க வேண்டும். 

பின்னர் அதில் கறிவேப்பிலை மற்றும் மாங்காய் துண்டுகளை சேர்த்து நன்கு வதக்க வேண்டும். பின்னர் இதை குளிர வைக்க வேண்டும். பின்னர் மிக்சியில் வதக்கிய பொருட்களை சேர்த்து  உப்பு தூவி, சற்று கொரகொரவென்று அரைத்துக் கொள்ள வேண்டும்.

பின்னர் அரைத்த சட்னியை ஒரு கிண்ணத்தில் எடுத்து மிக்சியில் அதிகம் நீர் ஊற்றாமல் அளவாக நீரை ஊற்றி சற்று கெட்டியாக கலந்து கொள்ள வேண்டும்.

இறுதியாக ஒரு பாத்திரத்தை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை, வரமிளகாய் சேர்த்து தாளித்து, சட்னியுடன் சேர்த்து கலந்தால், சுவையான பச்ச மாங்காய் வேர்க்கடலை சட்னி தயார்.