வெறும் பத்தே நிமிடத்தில் சேமியா வெஜிடபிள் கிச்சடி செய்வது எப்படி?

சேமியா வெஜிடபிள் கிச்சடி குழந்தைகளுக்கும் பிடித்த மாதிரி செய்து அசத்தலாம்.

இந்த ரெசிபியை செய்ய 10 நிமிடங்களே போதுமானது.

தேவையான பொருட்கள்

1. சேமியா - 1 கப்
2. பெரிய வெங்காயம் - 1
3. தக்காளி - 1
4. பச்சை மிளகாய் - 3
5. இஞ்சி பூண்டு விழுது - 2 டீஸ்பூன்
6. உருளைக்கிழங்கு - 1
7. கேரட் - 1
8. பீன்ஸ் - 4
9. கரம் மசாலா தூள் - 1/2 டீஸ்பூன்
10. மஞ்சள் தூள் - 1/2 டீஸ்பூன்
11. பட்டை - 1
12. கிராம்பு - 5
13. பிரியாணி இலை - 2
14. கறிவேப்பிலை - 1 கொத்து
15. கொத்தமல்லி - சிறிது
16. உப்பு - தேவையான அளவு
17. எண்ணெய் - தேவையான அளவு

செய்முறை

வெங்காயம், தக்காளி, கொத்தமல்லி, காய்கறிகளை பொடியாக நறுக்கி கொள்ளவும்.

ஒரு பாத்திரத்தில் தண்ணீரை ஊற்றி, அடுப்பில் வைத்து நீரை கொதிக்க விடவும். அதே சமயம் ஒரு வாணலியை அடுப்பில் வைத்து, அதில் சேமியாவை பொன்னிறமாக வறுத்து, கொதிக்கும் நீரில் அந்த சேமியாவைப் போட்டு, 2 டேபிள் ஸ்பூன் எண்ணெய் விட்டு, இறக்கி மூடி தனியாக வைத்து கொள்ளவும்.

(முக்கியமாக சேமியா குலைந்து விடாமல் பார்த்துக் கொள்ளவும்.) பின் நீரை வடித்து, ஒரு தட்டில் அந்த சேமியாவை பரப்பி, குளிர வைக்கவும்.

பின் மற்றொரு வாணலியில் நீரை ஊற்றி, அதில் நறுக்கி வைத்திருக்கும் காய்கறிகளை போட்டு, வேக வைத்துக் கொள்ளவும்.

பிறகு மற்றொரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், பட்டை, கிராம்பு, பிரியாணி இலை போட்டு தாளித்த பின்னர் வெங்காயத்தை சேர்த்து பொன்னிறமாக வதக்கவும்.

வெங்காயம் நன்றாக வதங்கியதும் பச்சை மிளகாய், கறிவேப்பிலை, தக்காளி, இஞ்சி பூண்டு விழுது, மஞ்சள் தூள், கரம் மசாலா தூள் மற்றும் உப்பு சேர்த்து, பச்சை வாசனை போகும் வரை வதக்கவும்.

பின்னர் அதில் வேக வைத்துள்ள காய்கறிகளைப் போட்டு, மசாலா அனைத்தும் ஒன்று சேரும் வரை நன்கு கிளறவும்.

மசாலா அனைத்து காய்கறிகளுடன் ஒன்று சேர்ந்ததும், அதில் வேக வைத்த சேமியாவைப் போட்டு கிளறி, தீயை குறைவில் வைத்து, தட்டால் வாணலியை மூடி 5 நிமிடம் வேக வைத்து இறக்கவும்.

இப்போது சுவையான சேமியா வெஜிடேபிள் கிச்சடி ரெடி!!!