PAKvsAUS: அபார வெற்றியை பதிவு செய்த ஆஸ்திரேலியா அணி - தொடர் சாதனை

பாகிஸ்தானில் சுற்றுப்பயணம் மேற்கொண்ட ஆஸ்திரேலியா 3 டெஸ்ட் போட்டி மற்றும் 3 ஒரு நாள் போட்டி ஒரு டி20 தொடரில் பங்கேற்று விளையாடி வருகிறது. தற்போது 3-வது மற்றும் கடைசி டெஸ்ட் போட்டி லாகூரில் உள்ள கடாபி ஸ்டேடியத்தில் நடைபெற்றது.

டாஸ் வென்ற ஆஸ்திரேலியா பேட்டிங் தேர்வு செய்தது. அதன்படி முதலில் களமிறங்கிய ஆஸ்திரேலியா முதல் இன்னிங்சில் 391 ரன்களுக்கு ஆல் அவுட்டானது. அணியில் அதிகபட்சமாக கவாஜா 91, கிரீன் 79, அலெக்ஸ் கேரி 67, ஸ்மித் 59 ரன்கள் எடுத்தனர்.

அதன் பின்னர் ஆடிய பாகிஸ்தான் முதல் இன்னிங்சில் 268 ரன்களுக்கு ஆல் அவுட்டானது. அப்துல்லா ஷபிக் 81 ரன், அசார் அலி 78 ரன், கேப்டன் பாபர் அசாம் 67 ரன்கள் எடுத்தனர்.

மேலும், ஆஸ்திரேலியா சார்பில் பாட் கம்மின்ஸ் 5 விக்கெட், மிட்செல் ஸ்டார்க் 4 விக்கெட் வீழ்த்தினர். 123 ரன்கள் முன்னிலை பெற்ற ஆஸ்திரேலியா, 2வது இன்னிங்சில் 60 ஓவரில் 3 விக்கெட்டுக்கு 227 ரன்கள் எடுத்த நிலையில் டிக்ளேர் செய்தது.

கவாஜாவும் 104 ரன்களை கடந்தார். டேவிட் வார்னர் 51 ரன்கள் அடித்தார். இதனால் பாகிஸ்தான் அணி வெற்றிபெற 351 ரன்களை இலக்காக நிர்ணயம் செய்தது. தொடர்ந்து 4 நாள் முடிவில் பாகிஸ்தான் அணி விக்கெட் இழப்பின்றி 73 ரன் எடுத்தது.

இந்த நிலையில், கடைசி நாள் ஆட்டமான நேற்று பாகிஸ்தான் வெற்றி பெற 278 ரன்கள் தேவைப்பட்டது. ஆரம்பம் முதல் பாகிஸ்தான் அணி சீரான இடைவெளியில் விக்கெட்டுகளை இழந்தது.

தொடர்ந்து, தொடக்க ஆட்டக்காரர் இமாம் உல் ஹக் மற்றும் கேப்டன் பாபர் அசாம் ஆகியோர் அரை சதமடித்தனர். பின்னர் அடுத்தடுத்து விகெட்டுகளை பறிகொடுக்க பாகிஸ்தான் அணி 2வது இன்னிங்சில் 235 ரன்களுக்கு ஆல் அவுட்டாகி, 115 ரன்கள் வித்தியாசத்தில் ஆஸ்திரேலியா அணியிடம் தோல்வியை தழுவியது.

இமாம் உல் ஹக் 70 ரன்னும், பாபர் அசாம் 55 ரன்னும் எடுத்தனர். டெஸ்ட் கிரிக்கெட் வரலாற்றில் 3வது முறையாக பாகிஸ்தான் மண்ணில் டெஸ்ட் தொடரை வென்றது ஆஸ்திரேலிய அணி. சிறப்பாக விளையாடிய ஆட்டநாயகனாக பாட் கம்மின்ஸும் தொடர் நாயகனாக உஸ்மான் கவாஜாவும் தேர்வு செய்யப்பட்டனர்.