முதலைக் கறி முதல் கடற்குதிரை வரை... கமலின் உணவுப் பழக்கம் குறித்து வியந்து சொன்ன ஸ்ருதிஹாசன்!
Shruti Haasan Reveals Kamal Haasan’s Unusual Food Habits : நடிகர் கமல்ஹாசனின் வித்தியாசமான அசைவ உணவுப் பழக்கம் குறித்து அவரது மகள் ஸ்ருதிஹாசன் சுவாரஸ்யமான தகவல்களைப் பகிர்ந்துள்ளார். குறித்த விடயம் தற்போது இணையத்தில் வைரலாகி வருகின்றது.
கமல்ஹாசன்
இந்தியத் திரையுலகில் தனக்கென தனி அடையாளத்தை உருவாக்கியவர் நடிகர் கமல்ஹாசன். சிறுவயதில் தொடங்கிய அவரது திரைப்பயணம் இன்றுவரை தொடர்ந்து கொண்டிருக்கிறது.

நடிப்பு மட்டுமின்றி இயக்கம், தயாரிப்பு, திரைக்கதை எனப் பல துறைகளிலும் தடம் பதித்துள்ள அவர், தனிப்பட்ட விருப்பங்களிலும் தனித்துவமானவர். தற்போது அருண்குமார் இயக்கத்தில் உருவாகும் 'சண்டியர்' திரைப்படத்தில் நடித்து வருகிறார்.
ஏற்கனவே 'விருமாண்டி' படத்துக்கு முதலில் வைக்கப்பட்டிருந்த இந்தப் பெயர், சில சர்ச்சைகள் காரணமாக மாற்றப்பட்டது. பல ஆண்டுகளுக்குப் பிறகு மீண்டும் அதே தலைப்பில் கமல் நடிப்பது கவனத்தை ஈர்த்துள்ளது.

அசைவ உணவில் அலாதி பிரியம்
கமல்ஹாசனுக்கு அசைவ உணவுகள் மீது அதிக விருப்பம் என்பது திரையுலகினர் அறிந்த விஷயம். அவரது உணவுப் பழக்கம் குறித்து பலரும் விமர்சித்தபோதும், அதனைப் பொருட்படுத்தாமல் தனக்குப் பிடித்த உணவை விரும்பிச் சாப்பிடுபவர்.
ஒருமுறை அவர் கோழிக்கறி சாப்பிடுவதைப் பார்த்த நடிகர் நாகேஷ், நகைச்சுவையாக, "இன்னுமா அந்தக் கோழி சாகவில்லை?" என்று கேட்டதாகக் கூறப்படுகிறது. அதேபோல், கமலின் அசைவ உணவுப் பழக்கத்தைப் பார்த்து நடிகர் சிவாஜி கணேசனும் ஆச்சரியப்பட்டிருக்கிறார் என்பது குறிப்பிடத்தக்கது.

முதலைக் கறி முதல் கடற்குதிரை வரை...
இந்நிலையில், தனது தந்தையின் வித்தியாசமான உணவுப் பழக்கம் குறித்து நடிகை ஸ்ருதிஹாசன் அண்மையில் அளித்த பேட்டியில் சுவாரஸ்யமான தகவல்களைப் பகிர்ந்துள்ளார்.
அதில், "அப்பா எனக்கு நிறைய அசைவ உணவுகளைச் சாப்பிடக் கொடுத்திருக்கிறார். நான் முதலைக் கறி சாப்பிட்டிருக்கிறேன். அது நன்றாக இருக்கும். ஈசலைக்கூட அப்பா வீட்டிலேயே சமைப்பார்.பேபி ஆக்டோபஸ், கடற்குதிரை எனப் பல வித்தியாசமான உணவுகளைச் சாப்பிட்டிருக்கிறேன்.
ஒருநாள் ஃபிரிட்ஜைத் திறந்து பார்த்தபோது, அதற்குள் கடற்குதிரை கிரேவியில் மிதந்துகொண்டிருந்தது" என்று தனது சிறுவயது அனுபவங்களை ஆச்சரியம் கலந்த சிரிப்புடன் பகிர்ந்துள்ளார்.
கமல்ஹாசனின் வித்தியாசமான உணவு ரசனை குறித்த ஸ்ருதிஹாசனின் இந்தப் பகிர்வு தற்போது ரசிகர்கள் மத்தியில் வியப்பபையும் சுவாரஸ்யத்தையும் ஏற்படுத்தியுள்ளது.
| சுவாரஸ்யமான செய்திகளை நொடிப் பொழுதில் தெரிந்து கொள்ள மனிதன் WHATSAPP CHANNEL இல் இணையுங்கள் FOLLOW NOW |