பிக் பாஸ் ஒளிபரப்பாகும் நேரத்தில் அதிரடி மாற்றம்? கடும் அதிருப்தியில் ரசிகர்கள்
பிக்பாஸ் ஐந்தாம் சீசன் அக்டோபர் 3ம் தேதி தொடங்கும் என அதிகாரப்பூர்வமாக அறிவிக்கப்பட்டு இருக்கிறது.
பிக் பாஸ் 5ஐ விளம்பரப்படுத்தும் நோக்கில் பல ப்ரோமோ வீடியோக்களை வெளியிட்டு வருகிறது விஜய் டிவி. அதற்கு நல்ல ரெஸ்பான்ஸ் கிடைத்து வருகிறது. முந்தைய சீசன்களை போல இந்த சீசனையும் கமல்ஹாசன் தான் தொகுத்து வழங்குகிறார்.
அக்டோபர் 3ஆம் தேதி மாலை 6 மணிக்கு மிகப்பிரமாண்டமாக துவக்க நிகழ்ச்சி நடைபெற இருக்கிறது.
போட்டியாளராக யாரெல்லாம் வரப்போகிறார்கள் என்பது அன்று தான் அதிகாரப்பூர்வமாக தெரியவரும். இதற்கு முந்தைய சீசன்களில் பிக் பாஸ் இரவு ஒன்பது முப்பது மணி முதல் பத்து முப்பது மணி வரை ஒளிபரப்பாகி வந்தது. ஆனால் இந்த சீசனில் அது மாற்றப்பட்டு இருப்பதாக தகவல் வெளியாகி உள்ளது.
துவக்க நிகழ்ச்சி மாலை 6 மணிக்கு தொடங்கி 11 மணி வரை ஒளிபரப்பாகும் என கூறப்படுகிறது.
மற்ற நாட்களில் வழக்கமாக ஒன்பது முப்பது மணிக்கு பதில் அரை மணி நேரம் தாமதமாக 10 மணிக்கு தான் தொடங்கும் என கூறப்படுகிறது.
தினமும் இரவு 10 மணி முதல் 11 மணி வரை பிக்பாஸ் 5 ஒளிபரப்ப விஜய் டிவி திட்டமிட்டு இருப்பதாக கூறப்படுகிறது. இந்த தகவல் இணையத்தில் மிக வேகமாக பரவி வரும் நிலையில், ரசிகர்கள் அதிருப்தியை வெளிப்படுத்தி வருகின்றனர்.
விஜய் டிவி இது பற்றி அதிகாரப்பூர்வ அறிவிப்பை வெளியிட்டால் தான் உறுதியாகும்.