டாலருக்கு D இல்லாமல் $ சின்னம் ஏன்? பலரும் அறியாத உண்மை

இந்திய ரூபாயின் மதிப்பு அவ்வப்போது ஏற்ற இறக்கங்களைச் சந்தித்தாலும், அமெரிக்க டாலருடன் ஒப்பிடும்போது அதன் மதிப்பு நீண்ட காலமாகவே குறைவாக இருந்து வருகிறது.

உலகின் பல்வேறு நாடுகளின் நாணயங்களை ஒப்பிட்டுப் பார்த்தாலும், சர்வதேச அளவில் டாலர் மிகவும் முக்கியத்துவம் வாய்ந்த நாணயமாகவே இருந்து வருகிறது. ஆனால், “டாலர்” என்ற வார்த்தையைக் கேட்டவுடன் நம் நினைவுக்கு வருவது அதன் மதிப்பு மட்டுமல்ல. உடனடியாக நினைவுக்கு வருவது $ என்ற அந்தப் பிரபலமான சின்னம்தான்.

ஒரு விஷயத்தை எப்போதாவது கவனித்திருக்கிறீர்களா? டாலர் என்பது ஆங்கிலத்தில் Dollar. அப்படியிருக்க, அதன் சின்னத்தில் ஏன் D இல்லை? அமெரிக்காவைக் குறிக்கும் வகையில் A அல்லது US போன்ற ஏதாவது ஒரு குறியீடு ஏன் இல்லை?

அதற்குப் பதிலாக S போன்ற தோற்றம் கொண்ட ஒரு சின்னம் எப்படி டாலரின் அடையாளமாக மாறியது? இந்தக் கேள்விக்கு பின்னால் பல நூற்றாண்டுகளைக் கடந்து வந்த சுவாரஸ்யமான வரலாறு இருக்கிறது. இது குறித்த விரிவான விளக்கத்தை இந்த பதிவில் பார்க்கலாம்.

கடல்கள் அனைத்தும் நன்னீராக மாறினால்… பூமிக்கு என்ன ஆகும்? அதிர்ச்சியளிக்கு தகவல்!

$ சின்னம் உருவான வரலாறு

அந்த வரலாற்றை சற்று பின்னோக்கிப் பார்த்தால், இன்றைய $ சின்னம் எப்படி உருவானது என்பதற்கான பல சுவாரஸ்யமான தகவல்கள் குறிப்பிடப்படுகின்றன. 

அமெரிக்க டாலர் எப்போது அறிமுகமானது?

அமெரிக்கா தனக்கென ஒரு அதிகாரப்பூர்வ நாணய முறையை உருவாக்குவதற்கு முன்பு, அங்கு பிரிட்டிஷ் பவுண்டுகள், ஷில்லிங்குகள், பென்ஸ்கள் உள்ளிட்ட பிரிட்டிஷ் நாணயங்கள் பயன்படுத்தப்பட்டன. பின்னர் அமெரிக்காவில் தனித்த நாணய முறையை உருவாக்கும் முயற்சிகள் தொடங்கின.

1775ஆம் ஆண்டில் டாலர் என்ற அலகு பயன்படுத்தப்படத் தொடங்கியது. தொடர்ந்து, 1785ஆம் ஆண்டு அமெரிக்க காங்கிரஸ் டாலரை நாட்டின் அதிகாரப்பூர்வ நாணய அலகாக ஏற்றுக்கொண்டது. ஆனால், இன்றைய அமெரிக்க டாலர் உருவாகும் முன்பே, அங்கு வேறு ஒரு முக்கியமான நாணயம் பரவலாகப் பயன்படுத்தப்பட்டு வந்தது.

டாலருக்கு முன்பு பயன்படுத்தப்பட்ட நாணயம் எது?

அது ஸ்பானிஷ் பெசோ. Peso de Ocho Reales என்று அழைக்கப்பட்ட இந்த நாணயம், அந்தக் காலத்தில் சர்வதேச வர்த்தகத்தில் மிகவும் பரவலாகப் பயன்படுத்தப்பட்டது. குறிப்பாக அமெரிக்கக் காலனிகளிலும் இதற்கு மிகுந்த முக்கியத்துவம் காணப்பட்டது. 

அதன் பயன்பாடு அமெரிக்காவில் டாலர் அதிகாரப்பூர்வமாக ஏற்றுக்கொள்ளப்பட்ட பின்னரும் உடனடியாக மறைந்துவிடவில்லை. மாறாக, 1857ஆம் ஆண்டு வரை ஸ்பானிஷ் பெசோ அமெரிக்காவில் சட்டப்பூர்வமான நாணயமாகப் புழக்கத்தில் இருந்தது.இதுதான் டாலர் சின்னத்தின் வரலாற்றில் ஒரு முக்கியமான திருப்புமுனையாகக் கருதப்படுகிறது.

அப்படியென்றால் ‘S’ எப்படி வந்தது?

$ சின்னம் எப்படி உருவானது என்பதற்கு ஒரே ஒரு உறுதியான விளக்கம் இல்லை. வரலாற்றில் பல்வேறு கோட்பாடுகள் முன்வைக்கப்பட்டுள்ளன. அவற்றில் மிகவும் பிரபலமான ஒரு கோட்பாடு, இந்தச் சின்னத்துக்கு ஸ்பானிஷ் பெசோவுடன் தொடர்பு இருப்பதாகக் கூறுகிறது.

அந்தக் காலத்தில் வணிகர்கள் ஸ்பானிஷ் பெசோவை சுருக்கமாகக் குறிப்பிடும்போது, “P” மற்றும் “S” ஆகிய எழுத்துகளை இணைத்து எழுதும் பழக்கம் இருந்ததாகக் கூறப்படுகிறது.

கையெழுத்தில் இந்த இரண்டு எழுத்துகளும் தொடர்ந்து ஒன்றோடொன்று இணைந்து எழுதப்பட்டதால், காலப்போக்கில் அதன் வடிவம் சுருங்கி, இன்றைய $ சின்னத்தைப் போன்ற தோற்றத்தைப் பெற்றதாக ஒரு கோட்பாடு தெரிவிக்கிறது.

குப்பையையே டன் கணக்கில் இறக்குமதி செய்யும் ஸ்வீடன் - காரணம் என்ன தெரியுமா?

அதாவது, இன்று நாம் ஒரு டாலரைக் குறிக்க பயன்படுத்தும் $ சின்னம், ஒரு நாளில் திடீரென உருவாக்கப்பட்ட குறியீடு அல்ல; பல ஆண்டுகளாக வணிகர்களின் எழுத்து மற்றும் கணக்குப் பயன்பாட்டில் ஏற்பட்ட மாற்றங்களின் விளைவாக உருவானதாகக் கருதப்படுகிறது.

ஆனால் இதுதான் ஒரே விளக்கம் அல்ல. மற்றொரு கோட்பாட்டின்படி, $ சின்னத்துக்கு ஸ்பெயினின் தேசிய சின்னத்துடன் தொடர்பு இருக்கலாம். குறிப்பாக, ஸ்பெயின் நாட்டின் சின்னத்தில் இடம்பெறும் ஹெர்குலஸின் தூண்கள் மற்றும் அவற்றைச் சுற்றியுள்ள ரிப்பன் போன்ற வடிவங்களிலிருந்து இந்தச் சின்னம் உருவாகியிருக்கலாம் என்று கூறப்படுகிறது.

இன்னொரு பிரபலமான கருத்து, “US” என்ற எழுத்துகளின் இணைந்த வடிவமே காலப்போக்கில் $ சின்னமாக மாறியிருக்கலாம் என்பதாகும். ஆனால் இவற்றில் எதுவுமே முழுமையாக நிரூபிக்கப்பட்ட வரலாற்றுச் சான்றுகளைக் கொண்டதாக இல்லை.

அதனால்தான் $ சின்னத்தின் உண்மையான தோற்றம் குறித்து இன்றும் வரலாற்று ஆய்வாளர்களிடையே விவாதம் தொடர்கிறது என்பது குறிப்பிடத்தக்கது.